I

Изыдет Астролог с трубкою и глаголет:

Изыду в люди, в мире проявляся,
Многим на пользу пожити потщуся.
Прежних весь мой век в науках премногих,
Вем пользовати богатых, убогих.
Наипаче буду на звезды глядати
И будущая людем провещати.

(Вымет трубку и смотрит на звезды и глаголет:)

Доброе лето имать ныне быти,
Жито, пшеницу хощет нам родити.

(Паки посмотрит и глаголет:)

Ученым людем мало будет чести,
Едва довольно дадут пити, ести.

(Паки посмотрит и глаголет:)

Правды не станет, лжа по градом ходит,
Гнев божий весьма по себе приводит.

(Паки посмотрит и глаголет:)

Добро жити совещаю,
Хищников много быти познаваю.

(Ту, снимая с себя одежду и положа, смотрит паки; в то время тать покрадет, а он глаголет:)

Благое ведро ныне имать быти,
Ни капли дождя восхощет мочити.
Всуе, опанчю носящи, трудихся:
Нигде водою аз, мню, омочихся.

(Паки смотрит и глаголет:)

В чюжих потребах мудрыми бывают,
Сами в своей беде ничесоже знают.

(В то время дождь его обольет, он же глаголет:)

Откуду дождь сей? Звезды не являху,
Паче ведро велие вещаху;
Взяти опончю, чтобы ся окрыти.
Не чаях дождем днесь омочен быти.

(Кинется до епанчи; не обрет же ея, глаголет:)

Увы мне, яко в небо засмотрихся!
Опончи, шапки чрез воров лишихся.
Обаче еще имам усмотрати,
Егда возмогу татя поимати.

(Паки посмотрит и глаголет:)

Щастливый путь небо мне проявляет,
За татьми скоро в путь итти повелевает.

(Ту бежит скоро и впадет в яму; а Мужик пришед просты и глаголет:)

Се тебе, глупче, что высоко зрищи,
А на землю под ноги не смотриши.
Ты будущая дерзну провещати,
Твоих случаев не возмог познати:
Впал еси в яму темную глубоко
За то, что в небо зрел еси высоко.
Лучше под ноги прилежно смотрети,
Землю орати, неже в звезды зрети.
Полежи в яме мало, потруждайся,
Да тя извлеку, три дни дожидайся.

(И отходит за завесу.)

II

Выходит Пьяница и глаголет:

Благий обычай у честных бывает:
Кто больши любит, больше испивает.
Такову любовь аз хощу явити,
О твоем здравии сию чашу пити.

Блудный речет:

О мой любезный! како ти воздати
И слово твое мило зело вняти?
Се сто червонных в чашу полагаю;
Аще испиешь, тебе их вручаю.
Но, мой любезный, потщися испити,
Радости сердцу моему приложити.

Пьяница.

Здрав, господине, буди многа лета!
Испию до дна ради тебе, света.

(Та чаша первие наполнена яве, а потпом тайно источится, юже он подъем праздну, аки испиет; потом взем деньги повалится и речет:)

Блудный.

Возьмите его, спати отведите;
Да целы будут златницы, блюдите.

(Слуга возьмет пьяного и на сторону положит; он плачет, аки умирати. Придет демон, возьмет душу и отнесет во ад, а слуга един, посмотрев мертваго, бежит ко Блудному и речет:)

Честны господине! брат наш умирает,
Напився сладце, душу изрыгает.

Блудный.

Земля велика, есть где сохранити.
Испил сто златниц, можно гроб купити.

Собеседник (к тому слузе речет:)

Слушай, мой брате: шед, погреби тело,
Мы с господином поседим весело.

(Той слуга поидет и в яму кинет тело мертваго, а господин с другим другом далее веселятся.)

Ту треба закрывати.



   назад       далее